2007年2月17日星期六

雲南茶馬古道遊蹤 - 昆明 Kunming

今年農曆年假只要請3日就可以放足9日,所有又想去旅行,之前成日睇到D雲南旅遊相片咁靚,真係好想快d去睇睇,所以一於襯哩幾日咁得閒,搵腳去雲南先! 今次既伴遊組合都幾新鮮,有識有唔識,一行6個人,經仔細研究過行程同安排之後,終於向16號晚先上深圳集合,17號一大朝早正式出發!

第一站:昆明

其實昆明只係今次行程既轉站位,冇乜期望,最想要遊覽既就只有西山龍門,開講都有話一登龍門聲價十倍,咪又即管睇下有幾勁囉! 原本係網上訂好酒店,不過去到機埸去到酒店代辦處睇睇,發覺都有其他選擇,平d又有車接,所以一於轉酒店,$250/三人房都算幾平啦! 一行6人Check-in完,大家決定先去滇池,因為滇池同西山龍門好近。

景點一:滇池

從酒店打的出發到滇池索道大約$40,滇池好大,湖水亦算清澈,但係其實都冇乜特風景可然,所有於附近既索道餐廳食完飯後,立即坐索道上西山龍門。

景點二:西山龍門



上山除左可以坐索道之外,仲可以坐車,當然想要欣賞到滇池同埋昆明市既全貌,最好都係選坐索道,單程$40,來回$70不過記住3:30pm就收架喇! 上到山其實仲有排行先去到龍門石窟,大約要行成個鐘頭,幸好當日天氣非常清爽,沿路亦可俯瞰昆明市和滇池的風景,咪當去行山囉! 都唔算辛苦既! 進入龍門石窟之前亦須邀付入埸費,每人$30。西山公園係對龍門石窟和三清寺既一個統稱,始建於唐代,經過多個朝代先後做過行宮,佛寺,道觀等,加上地勢險要,值得一遊!

景點三:圓通寺

圓通寺係昆明最古老既佛教寺院,睇旅遊書話哩個時候去會有桃花睇,等我仲鬼咁期待添! 誰不知去到發現原來係流流的一間黃大仙0黎! 激氣! 好彩唔洗俾入場費! 如果唔係仲加搵笨!

景點四:金馬碧雞坊

位於昆明市中心,以金馬山和碧雞山而命名,建於明朝,傳說話每逢60年既秋天時分,兩坊的倒影會重疊一起,不過傳說既野聽完咪算囉!