2009年7月7日星期二

情迷法蘭西 - 法式滋味 Bon Appetit III

最後要講既就係法國既蔬果,原來都好好食架,價錢又唔貴,士多超市都買得到,好方便。南法水果我既首選肯定係蜜瓜啦,最出名就係南法Cavaillon每年6-8月份盛產既Melon,瓜仔細細味道清甜多汁,每個都係賣€2-3蚊咋,唔食多幾個真係對唔住自己,用泥配意大利 Parma ham 仲 Good啦!搞到我臨上飛機都要向老佛爺超市部夾左兩個偷運番香港慢慢嘆!YEAH!

*哩餐埋單€45.4

第二讚肯定係車厘子,大大粒實的的夠晒甜,最緊要係超值1kg賣€5咋,忍到口都忍唔到手啦!

南法屬於地中海氣候,所以都好適合無花果既生長,煲湯就食得多喇,新鮮既又試過味呢!

原來Summer泥法國可以食到咁多當造平靚正水果喎,士多啤梨都好吸引呀!

今次都行左幾個市集,見到好多好新鮮既蔬菜,好似白露荀、蕃茄仔、雅枝竹啦,可惜今次唔係住dorm,如果唔係就有機會一展身手啦!下次再泥歐洲,除左要行市集之外,仲要安排住番一兩晚有廚房既Dorm先得。




2009年7月6日星期一

情迷法蘭西 - 法式滋味 Bon Appetit II

講完法國大餐,又點少得法式甜品呢,無論西餅麵包亦或雪糕都係咁令人回味無窮!講到西餅向巴黎梗係要數 Laudree 餅店啦,過百年老子號,當然有番咁上下,佢地最近仲向巴黎戴高樂機場都開左檔外賣counter,專賣法國著名甜點Macaron,除左Macaron之外,佢地既件裝西餅件件都咁出色,可惜胃只得一個,只可一件起兩件止囉!下面哩件叫 Saint Honore/ €4.9算係法國傳統款式,上面以mini puff做裝飾,賣相討好,味道一流!Champs Elysees大街都有分店!舊年海港城都開左分店,不過只賣Macaron 同果醬、茶包之類,一件少少既馬卡窿賣成HK$20,嘩唔知租金佔左幾多呢!賣到天價但仍然人龍不絕,香港人真係不可思異!

*堂食貴好多架,賣走吧啦!

*目不暇給

*意亂情迷

另外一間好出名既餅店叫 Dalloyau,有好幾間分店,就連老佛爺入面都買得到,招牌貨又係 macaron,仲有好多款味道任揀!口感鬆化唔太甜,送禮自用饋贈親友都一流!如果自用既話,好似賣4.x歐羅/ 4件,送禮連靚靚盒就要€7-14!
*Bastile店

*Macaron

Paul 係法國連鎖麵包店,唔好睇少D連鎖式經營呀,經團友們試味獲得一致好評,佢個牛角包鬆脆可口,牛油味十足,mini版每個只售€0.45(外賣);另外,哩個叫Canele既蛋糕,聽講係Bourdeaux波爾多既特式甜品,口感同味道都有D似黃金糕,又幾好味播!

*Cannes店

香港食唔番

個人認為向法國是旦幫襯一間餅店,都會食到好味既蛋糕西餅,賣相又靚,價錢都唔貴喎!有相為證架!下面哩間位於Avignon大街,鮮果撻4個半3件,讚!
*馬賽餅店

€2.5

除左西餅之外,法國人都好鍾意食意式雪糕Gelato,好似連間 Amorino 全國都有分店,款式多味道好!下面哩個雪糕包Focaccina €4,即叫即製可以揀兩款口味,外面熱裡面冷,滋味無窮!

*Avignon分店
*(2 scope/ €3)

€4


情迷法蘭西 - 法式滋味 Bon Appetit I

此行除左南法薰衣草花田之外,美食亦係重點推介。我編既行程出名密集,但係仍不忘加插品嚐地道美食既環節,美景美食可謂缺一不可。法國大餐名聞遐邇,海鮮、甜品、麵包、水果、地道菜餚、美酒、每樣都係咁令人為之興奮雀躍。整個旅程最令我難忙既有兩餐,首選Marseille Coquillages toinou 既 二人前海鮮拼盤La Sortie en Mer :8隻Fine de Claire No.3生蠔、一隻睡覺蟹、2隻龍蝦仔、12隻青口、12隻小蜆、4隻大蝦、4隻海螺、4隻北極螺再加6隻Speciale de Claire No.2生蠔,合共€51,簡直就係重量級既size,流口水指數係五粒星!不過一下子空肚食咁多生冷野,查實都幾傷胃架,最好都係食番個麵包頂住個胃先,話時話哩三款包醬原來都好好食架喎!

* Yummy


*認住佢呀!

假如閣下齋去巴黎血拚唔得閒既話,幫襯老佛爺Gourmet食海鮮都ok喎,哩6大隻Speciale de Claire No.2生蠔賣緊€12咋!No. 代表蠔既size,No.1最大No.5最細,No.2就最適中喇!



第二正既康城巴士總站隔離個檔賣燒雞既Chick N Chip,大大隻超juicy燒雞都係賣€8咋,唔講價錢齋評味道都贏啦!講起食哩隻雞都幾搞笑,因為我地趕巴士,所以買完就跑番去巴士站,一上車就來不及你一手我一手,不消15分鐘就將佢完全消滅!爽死!

除左上面個seafood platter外,哩到食青口又係一流,大大份都只係賣€10/set,白酒煮又得白汁煮又得茄汁都得,再配一碟新鮮炸薯條,認真滋味無窮,不過D青口實在太新鮮啦,懷疑冇經過任何清水沖洗過,搞到個汁好鬼鹹,好似海水一樣,薯條都係點ketup食好D喇!


講開海鮮此行都食唔少,生既熟既都有,冬唔知係咪南部靠海亦近西班牙,都食過兩次西班牙炒飯,海鮮用料十足,味道又好,軟硬度適中,比向西班牙食既硬paella仲0岩口味!*哩兩餐都係向Avignon食既,唔至有海鮮仲有雞脾添!


其實法國有好多好多地道菜式,今次由於時間既關係未能一一細味品嚐,只能遇到邊樣就食邊樣,好似哩味法式田蝸咁,就係向巴黎聖母院附近一間餐廳是旦叫個套餐先食到既,雖然哩間野名不經轉,但係味道都唔差,€14一個2 course 午餐,頭盤係焗田蝸,主菜可選pizza或燒牛扒,再跟咖啡茶,向法國menu入面既價錢已經包晒稅同加一架喇,放底€14就走得!亦唔迫你飲礦泉水,大可要求俾tap water即係水喉水,唔使驚喎哩到d水喉水已經過處理,請放心飲用!如果想點礦泉水既話,不如試試一款叫Badoit 既有氣礦泉水,係法國本土出產,無pierier咁苦,味道既好幾易入口!飲唔慣有氣既話,就買番Evian啦!

*法式煎牛扒大部份都係薄燒,當然唔係間間都好味啦,都好彩食三次都有兩次好味既!特別係向Avignon大街個間露天酒吧個次最好味,€11/set以法國既物價指數都唔算貴啦!Medium 0岩0岩好

講到向南法avignon既餐廳算係比較便宜,仲幾好食添!好似哩間連鎖任食快餐Flunch 就真係抵到爛喇,下圖哩set野賣€7咋,舊魚係主菜,旁邊既配菜可以任添任食,仲包一杯汽水,甜品係另加既,唔要甜品實收€5,各位餓左好多日既backpacker去到法國,見到哩間野就記住幫襯喇,有氣有力先可以繼續行架麻!向nice火車站隔離就有一間分店喇!



上一篇:情迷法蘭西 - 蒙地卡羅 Monte Carlo
下一篇:情迷法蘭西 - 法式滋味 Bon Appetit II

2009年7月5日星期日

情迷法蘭西 - 蒙地卡羅 Monte Carlo

Montre Carlo - Monaco
從Nice坐巴士#112,大約一個鐘就抵達蒙地卡羅,一個位處南法既獨立皇國,哩個國家雖然好細,但係一D都唔輸蝕,要幾豪有幾豪,係歐洲人既享樂天堂!

Casino


Opera

Port de Monaco

Palalis Princier


*咁橋俾我地遇正佢地有閱兵儀式睇添!


上一篇:情迷法蘭西 - 康城 Cannes

情迷法蘭西 - 康城 Cannes

南法向來都係有錢人既聖地,陽光海灘、俊男美女、名車遊艇,一下子將全世界最美好既事物都擺向你面前,當然對於我地哩D凡夫俗子,哩一齊都只鏡花水月啦!不過有機會開開眼界亦未嘗不是樂事!就將眼前最美好既事物停留於腦海中為此行作結吧!

Cannes 康城
從Nice坐巴士#200票價€1,大約一個半鐘到康城。每年5月康城影展就向哩處舉行,企上紅地毯揮揮手影張相,再幻想一下自己身處星光熠熠既現場,感覺良好!會場行過兩步就係沙灘,係呀!哩到唔係石灘係沙灘泥架,今日35c最0岩出海暢泳啦,嘩!西方國家果然開放,男女老幼都泥晒過夠!Topless又如何!我地?就連鞋都冇除,淨係除左頂帽影相囉!哈哈,所以話章子怡個輯沙灘照都係入鄉隨俗0者,跟本無乜大不了,中國人太少見多怪喇!



Palais des Festivals 節慶宮

L'Alee des Etoiles du cinema星光大道
*哩條星光大道就弱D喇,細就不在話下啦,仲俾人踩到濛查晒喇!


上一篇:情迷法蘭西 - 蔚藍海岸 Grasse & Eze
下一篇:情迷法蘭西 - 蒙地卡羅 Monte Carlo