2009年1月28日星期三

越浦越開心 - 柬浦寨 吳哥窟 Angkor Wat I

從金邊過暹粒好簡單,向旅館就可以代買車飛~USD 9/ 位,春節期間貴少少啦我地要USD 11,唔坐車又可以坐船沿洞里薩河一直上,都係一樣要坐足5粒鐘,如果揀坐下午班船既話,仲可以順便睇埋洞里薩湖既日落添,不過船票較貴~USD 19所以都係坐番大巴算啦。大巴都算幾舒服仲有電影睇,泰文MV聽添!一上車就有野派礦泉水、麵包、濕紙巾,都算招呼周到!去到暹粒已經成6pm,旅館派車過泥接我地過去,係正市中心間間房都有獨立浴室冷熱水,冷氣開放,每晚房費都係USD 7/位咋!都算係咁喇掛!
向暹粒既活動範圍其實好細,除左市中心就係吳哥窟景區,向哩到我地實際活動只有三日,事關要睇日出,朝朝05 通告,每日除左睇日出就係睇日落,日日向唔同景點欣賞日出日落,都咪話唔辛苦,我地哩團仲要冇中場休息,晚晚踩到7pm等景區拉閘放狗先肯走人囉!真係人都癲!好彩我地哩3日包左個大Van,當然你可以揀坐Tuk Tuk車啦,但係無遮無擋食塵咩!
吳哥窟景區每日5am開放,入場前買票,全電子化一日票USD 20、三日票USD 40,即時幫你影張靚相key入張飛到,逐個景點查飛,想偷雞都好難!遊吳哥主要分兩條大路線,大吳哥(Grand Tour) 小吳哥(Mini Tour) 。
第一日我地揀左先遊大吳哥線,日出地點就係皇家浴池Srah Srang 。一 / 二月份天氣特別好,所以日出日落都特別清晰。


通往大吳哥城既大道兩排刻有神像,咪以為佢地玩緊拔河,其實係拉住條大蛇呀!唔好問點解啦!

鬥象台係吳哥皇帝欣賞表演競技既地方。

跟住就係一系列既神廟,真係多到都唔記得叫乜喇,其中最出名既『高棉的微笑』即係好多佛像頭既神廟,就叫Bayon 巴戎寺,每個塔頂都刻左一個笑臉佛像,我冇仔細研究過但係就咁睇應該係個個唔同樣既,非常獨特。


之前睇過檸檬個集向世界恤髮,印象最深刻就係其中一座廟被好多大樹包圍住既,原來叫Taprohm Temple 塔普倫寺,聽講係某位吳哥皇為左紀念佢媽媽而建既,而家就被大樹壓住,不過亦因為被大樹包住,先未至於塌晒咋!


哩晚日落我地就揀左上Phnom Bakheng 巴肯山睇,座山唔算高但係行左成日,已經超級攰,即使只係短短25分鐘既路程都好攞命,又晒又熱又攰,仲要繼續行山真係唔講得笑,差D暈低!哩到既日落都ok靚既,太陽一下山,管理員就出泥清場,事關哩到係冇街燈既,唔襯仲有少少餘光快D落山,遲左太黑就麻煩啦!



上一篇:越浦越開心 - 柬浦寨 金邊Phnom Penh
下一篇:越浦越開心 - 柬浦寨 吳哥窟 Angkor Wat II