2009年1月24日星期六

越浦越開心 - 越全食 I

胡志明市景點欠奉,不過勝在有美食搭夠,一場泥到當然要尋找全城最牛既越南牛河先得啦!不過好唔好彩遇正春節,越南放春節假仲多過我地香港,一放就係7日,由年30晚一直放到初六先啟市,所以有好多傳說中既食府都幫襯唔到,真係可惜,事關未必再會去多次架喇!
Pho Le (413-415 Nguyen Trai, P7, District 5)
哩間牛河位於唐人街附近,上次蔡瀾都有介紹過,一直以為牛河可以有幾好食呢,碗碗都係差唔多架啦, 斷估都唔會食到嘩嘩聲掛!早兩日都仲以為係咁,食完哩間就知原來可以好唔同,飲第一啖湯就知好味,事關啖湯真係好濃牛肉味,牛得泥又唔會膻味!果真萬牛奔騰,超好味!每碗都才不過~HK$20,認真超值!





Pho Hao
哩間蔡瀾都有介紹過,不過個人認為唔及Pho le咁特出,不過勝在d料夠多夠特別,一碗雜錦牛河就有齊晒生牛肉、腩片、牛肚、牛柏葉、牛肋、肥牛、牛丸,配料除左青檸、九層塔之外,仲有兩款越南野菜,每碗都係為番港幣20蚊左右,所以向越南消費真係唔多使諗咁多,想食就食想買就買喇!一蚊美金就可以唱到一萬七越南盾,個個都係百萬富翁。




Pho Bo
哩間係酒店掌權推介既,位於Pham Ngu Lao,價錢大約只係HK$10/ 碗,真係平靚正,腩片肉質夠鬆化,厚薄適中,地膽介紹果然有料到喎!哩到除左牛河仲有蕃茄湯底既辣牛河添!向越南真係周街都係Pho店,梗有一間係左近,好多仲開到3更半夜,真係食牛河快過自己沖杯麵啦!D檸檬同九層塔都新鮮過人就知有料到啦!




Pho 24
哩間係近年新興既牛河連繫店,分店遍佈全越南,聽講係日本人開既,所以質素同衛生都有保證,當然價錢亦比坊間既貴好多啦,因為佢地主打係外國人生意架麻!味道都算幾好,但係坊間實在太多好味既牛河喇,唔使特登去搵泥食囉!