2010年3月27日星期六

春日櫻紅大會 - 大阪 Osaka I

班機3點半已到達,買車票連check-in搞搞下出到泥都成6點幾,當然今日基本上冇行程,主要安排食兩餐,本來先去食壽司,然後再返道頓堀食四天王拉麵,但係壽司店Full左,唯有順調。一場泥到大阪,點少得向大蟹同明冶前留影呢?


四天王拉麵向正道頓堀蟹道樂附近,唔難發現,排隊時順便買埋麵券,伙計叫埋位收飛仔好有秩序,基本750日元一碗,加蛋多50,口味有3種鹽味、味噌、醬油,我地一行六人最後認為醬油最得,最好加埋蛋事關溏心蛋真係好好味!


圍住難波一帶既商業圈,貫通心齋橋、道頓堀、南海通,衣食住行一應俱全。

除左Shopping同餐廳之外,出其地向道頓堀入面,就係位於法善寺入面有座小寺廟,恭奉水掛不動明王,廟雖小但無減善信,人氣仍然超旺盛。


今晚宵夜就係幫襯哩間位於南海通入面既 343鮨壽司店,老實講哩間真係幾抵食架,因為備有多款套餐,甚麼部長、課長、店長推介Set,價錢由980 – 1780日元不等,平日仲有2500日元既放題,總比下下散叫300-500日元一件抵食好多囉!我地向哩到食左馬肉同埋大拖羅壽司,馬肉就麻麻地啦,似似地牛肉,大拖羅就真係入口即溶,實在令人回味!話說大阪有種獨有手握法叫二枚重,即係普通一件壽司上面疊多舊魚生,多左舊魚當然會賣貴D啦!哈哈....不過口感又另捨唔同D既!


時間都唔早喇,快D返民宿沖涼瞓覺,明天再戰!