2010年3月28日星期日

春日櫻紅大會- 大阪 Osaka II

大阪預算留3日,當中包括兩日大阪市,加一天姬路城+奈良,除左飲飲食食同shopping 之外,大阪市內實際景點唔多,所以揀晒去大阪周遊卡既免費景點,個人覺得已經好足夠,跟本唔使再花錢去任何收費景點囉!第二日上午向難波駅食過精美早餐後,有氣有力開始一整天既行程。第一站千日前道具屋筋商店街,棋差一著唔原來好多舖頭星期日係唔開門架,不過都係順道泥行下既0者,開左1/3都好過冇啦!

之後再過行左去黑門市場,基本上幾個地方都好近,我地有大阪周遊卡就梗係坐車啦!黑門市場又係星期日唔多開門,同熟食街市差唔多,只係乾淨D同賣既野全部都係日本產,漢奸心理作祟日本出品應該好D既!哈哈,以前成日笑身邊D漢奸friends,講到日本乜野都好,連屎坑都係香過人既!哈哈,唔講得笑原來此話當真,日本人真係好乾淨,電子厠所佔90%以上使用率,就連公厠都冇水積冇臭味哩下抵讚呀麻!哩D咪叫家教囉,人家自細教育小朋友要整潔有禮貌,香港人‧‧‧唉,正所謂代代相傳,都係算吧啦!



黑門市場當日唯一一間營業兼付堂食既魚生店,服務態度差之餘,俾多碟豉油都話冇,吉碟都唔肯俾囉,我地都幫襯唔少架麻,再講哩到又唔係特別平,又唔係特別新鮮,真係唔建議大家泥哩到開餐囉,個人認為7點鐘去百貨公司食品部掃魚生剌生番酒店開餐仲好過,因為臨收舖一律8折至半價不等,好抵食架!


順道去埋四天王寺參觀(免費),冇冇無聊四圍行下咁囉!唔得閒可以Skip架!時間都唔早喇,諗住日落前上到去新世界通天閣頂樓(免費)睇日落,可惜排左成45分鐘隊,上到個咸蛋黃幾乎落晒喇!



時間唔早終於輪到今日重頭戲就係去Zuboraya づぼらや 新世界本店食河豚喇,我地當然唔會一人叫一個全宴食咁傻仔啦,咁貴唔好食咪好傷,都係散叫穩陣,分別點左3個基本一人前定食1700円,然後再追加一客河豚剌身,同埋一客河豚火鍋,咁就可以試勻晒多款河豚煮法,好過位位5000円啦!再講唔見到河豚有幾鮮味喎,返香港蒸條東星班食好過啦!最後見後面檯日本客食完個火鍋有位阿E幫手煮粥,我地都唔蝕底啦,原來係要加560円既,都好呀,乜都試下呀麻,竟然哩個粥係最好食架囉!但係同廣東魚粥相比,哩到真係食唔出有魚鮮味架!唉 . . . 到底何謂名物呢!?