2010年3月26日星期五

春日櫻紅大會 - 開催中

自上年法國之旅後,成大半年冇去過旅行,按我新一輪既策略就係少餐多食,哈哈…即係情願去少兩次,每次玩多幾日,短途旅情實在玩得唔夠暢快,一次過玩夠10日就差唔多!期待以久既旅程,終於等到出發既一刻喇,今次目的地係最最最大路既日本,主要城市包括大阪京都高山白川鄉名古屋,將人地原本兩次既日本之旅合併玩足11日,慳番要機票錢麻,哈哈哈!講到機票我地今次選擇坐冷門東航,經上海轉飛大阪,回程再由名古屋飛上海轉機返香港,毋需過夜停留,早去早返,票價低至$1690,連稅都係$2730,認真平到震!平野當然搶手啦,我地1月中出票先有位咋,有D團友2月中先出已經要waiting,竟然又wait到喎!

上午8:30香港出發,去到上海等兩個鐘中轉,抵達關西空港約15:30非常順利完全冇delay,馬上去南海電鐵買張 [大阪出張きっぷ]乗車券 1500日元,可以坐急行快車之外,仲送多張大阪地鐵一日乘車券,再買多一套2日用大阪周遊卡就夠晒玩啦!酒店方面因為唔想同人孖舖,又要平又加上旺季所以向大阪個幾日住民宿,扮下backpack年青人先!哩間民宿『星星之家』位於心齋橋過兩個地鐵站,位置都好好,又近站口,乾淨衛生獨立床,雖然要share浴室,反而有利女多男少團,事關一次過可以去沖涼,唔使逐個沖咁廢時呀麻!每人每晚3000日元。
不過京都個幾日,團友雖然少左但適逢花期,民宿一早滿晒,再講都唔係好平,所以上左樂天訂房,由於冇英文版所以都搞左一輪先明點訂,當然仲要靠幾位日本玩家指點先得啦!其實都唔係咁難既,小心D就ok!
京都間旅館位於京都駅好近叫『京都ホワイトホテル』,房費每人4650日元,0岩晒我地坐JR出入既旅客。好多人去日本都會買關西通行証,可能真係平D,但係有時坐JR都唔係貴好多,但係時間快好多喎,好似大阪去京都坐JR都只係540日元快靚正,坐阪急都要390日元啦,加上京都駅外大把巴士,去邊都咁方便,車站內既商場超好行,又靚又多野睇,感覺比大阪仲好,大阪實在太喧鬧喇!
跟住幾日就向日本中部出發,首站係岐阜縣高山市,誤打誤撞俾我向網上搵到條又平又抵既巴士線路,仲可以透過樂天下訂單,一切經網上處理,既方便又簡單,揀從京都出發車程仲可以縮短一個鐘,車費單程3000日元/位,方便舒適,一上車就可以進入睡眠時間,當中每隔一個鐘就俾你落車去去厠所方便下,好過坐JR多多聲啦!上午9時出發下午1時30分首抵高山市既櫻庵酒店,哩個站最近高山駅亦近我地經樂天訂既平靚正小旅館『清兵衛』,位置都算好近高山駅,5250日元一泊朝食,朝食仲要係朴葉味噌燒飛驒和牛,係咪超正呢!最緊要夠local,原晒汁原味!
去完高山白川鄉之後,沿路落下呂,又係坐濃飛巴士,由高山去下呂都要坐個幾鐘巴士,但都只係普通市巴,車支1010日元,要停成50個站先到。
講起下呂唔講唔知其實係日本三大名湯之一,我地又唔可以放過浸溫泉既機會啦,好在哩間溫泉酒店,冇港台旅遊書介紹過,唔會撞口撞面都係港客囉!哈哈,我對香港同胞全冇敵意,只係想感受多D當地既風土人情0者!之前睇菜生去日本一泊兩食,咁好玩,真係好羨慕呀!所以今次旅程一定要試下,搵左好耐,最終選定位於下呂大橋旁既『小川屋』,位置幾好,大大間設備齊全,室內露天風呂都有,朝食包和洋任食,晚餐包12道菜既飛驒牛會席料理宴,每人單價才12600日元,計計數才一千港元,嘩咁抵!真係一次過滿足晒三個願望呀,實在太感動喇!
玩完下呂又差不多到左今次旅程既尾聲,之前上網搵到有平巴士由下呂去名古屋,車程兩個半鐘,一日一班上午10點半向JR下呂駅對面開車,車費2100日元單程,來回既仲平3000日元咋!不過必須經由當地溫泉旅館代訂,臨出發前send定email俾酒店,叫佢地幫手預約車票,一齊都好順利。個email用英文定日本寫?哈哈,英日混合啦,加埋條hyperlink仲唔明咩,日本人唔識英文0者但係都好醒目架麻!
到逢名古屋已經係中午1時,由係JR名古屋駅作落車點,大包細包咁當然第一時check-in放低行李先啦,哩間酒店叫Wing's International 離名古屋駅只差一個地鐵站,又平又就腳,仲係正規商務酒店,每房有獨立厠所,Twin bed,一應俱全。

好腳特徵:(排名不分先後)
- 必須有自理能力事事親力親為、
- 要有決斷力(又要民主但係又冇主見者,最老土)、
- 性格爽朗隨和就得人(唔好要求別人遷就你,理應凡事以大局為重,盡量配合大會安排)、
- 要有三得就係捱得食得瞓得(行程緊湊冇怨言、有得食就食、有得瞓就瞓、唔好要求多多!有彈冇讚!) 、
- 有自由行經驗者更佳。
搵唔到上述咁好既旅腳,就唯有跟自己對私家腳(your own feet)去算囉!哈哈哈. . . 幸好我手頭上都仲有幾隻好腳0者!:)


下一篇:春日櫻紅大會 - 大阪 Osaka I